北海道殘體旅遊指南 教你裸體交往

(文章來源:果籽)地球已經冇大陸遊客去唔到的地方了!日本是他們的熱門出遊地,口裏說不,還是身體最誠實。日本人向來重視禮儀,與中國遊客簡直比矛盾更矛盾。去年日本北海道觀光振興機構出版簡化字指南《北海道旅行常識》,講解有甚麼行為在日本會被視為無禮。有居日大陸人認為咁樣樣即係話中國遊客「冇常識」,咁樣樣……

 

「喂,你本書裏面啲插圖係咁打交叉,而我又真係做緊嗰啲嘢,咁你即係叉我箒,我個心要碎了。」(真‧設計對白)。為免一地玻璃碎,當局早前把指南的名稱改為《北海道旅行心得》,內容有咁soft得咁soft,刪走不能、不要、不可等字眼,仲有埋英文版,證明唔係歧視中國遊客。

(以下內容已轉為正體字)
「不能插隊!」變成「排長隊也要安靜等待」
「不要擅自打開、食用商品」變成「可以信賴的日本產品」
「不可帶走非消耗品和非一次性用品」變成「酒店中可以帶走的物品僅為消耗品和一次性用品」

 

唔想失禮,大家都可以參考指南中的要點:

1.裸體交往

「如果穿着泳衣或浴衣、拖鞋等進入浴室,在場的日本人會大吃一驚。」裸體交往即係叫你要坦蕩蕩啲,大方啲。#絕冇性暗示。

2.小聲說話

「日本人說的日語是抑揚頓挫較少的語言,並且大家傾向於顧慮周圍地小聲說話。」連詩雅似乎唔應該去日本,佢講English嗰陣好loud。

3.餐桌保持清潔

「如果桌子上和地板上散落有食物的渣滓、骨頭等,就好像榻榻米被弄髒一樣日本人會感覺非常不舒服。」食得斯文啲,豪邁食相留番响香港大排檔用。

4.光盤行動

「受佛教影響,在日本反對浪費精神非常濃郁。」食物殘餘在碟上,對方會覺得是因為「不好吃」而覺得失望。

5.酒店中的穿着要講究

「大部份的西式酒店會在住宿須知中寫明『請不要穿着浴衣、浴袍、拖鞋等在走廊等客室外走動。』部份日式旅館可讓人這樣穿,但都唔係間間可以。只着孖煙囪?唔使問一定fail。

6.控制打嗝

「當然這屬於自然產生的生理現象,但至少請注意盡量克制。」生理現象唔係大晒,打嗝忍忍忍忍忍。

7.馬桶坐浴器的使用方法

「馬桶坐浴器的顯示板上有『臀部清洗』、『陰部清洗』、『脫臭』、『暖座』等功能。只是大多數的馬桶坐浴器上沒帶有沖水功能。」唔知點沖廁?廁所水槽側或牆壁上一定有手動杆或按鈕的,冷靜啲。怯,你就沖唔到水。

撰文: 葉青霞  容慧心