挪威ON CALL 36小時 坐郵輪追北極光

(文章來源:果籽)「各位先生女士,船長發現𠵱家有北極光睇嘞……」郵輪上,廣播未完,眾人已經攞齊追極光三寶:羽絨、相機和腳架,跑上甲板,抬頭看,「嘩~~~」「Oh my god!」「Amazing!」讚嘆之聲此起彼落。不用食北風,不用舟車勞頓,郵輪上追極光,原來這麼容易。

 

120年老字號 峽灣漂浮

太空總署預測太陽活動,將會在今年達到11年活動周期的高峯期,即係話,今年的極光將會特別頻繁特別靚。為睇北極光,我走到挪威北部最大城市、被譽為「北極光之門」的特羅姆瑟(Tromsø)。不少旅客都會參加陸上極光巴士團,開車到無光害的荒野,動輒要一兩小時;更要在寒風低溫下等極光,食足成晚西北風;一來一回六七小時,等了兩晚都撲空,半夜先回到酒店,攰過擔泥。

 

郵輪可安排陸上活動,當中最值得遊覽的是北角(Nordkapp),307米高的陡峭懸崖曾被歐洲航海家以為是歐洲最北之地,因而立標紀念。

郵輪上客人不多,可以輕輕鬆鬆在甲板上觀賞沿途的連綿雪山。

冬天日照時間短,大約9點或10點太陽才出來,再懶都可睇到靚日出。

在甲板上可以360°追北極光,加上光害少,睇得特別清楚。

 

懶人如我想睇極光,好彩仲有一個辦法,就是坐郵輪。問當地人,首選挪威老字號、無人不識的Hurtigruten,數數手指已經有120年歷史。挪威從南到北的海岸線足足有2,400公里長,1893年船長Richard With駕駛他的蒸汽船開通了南北航道,從那時開始,Hurtigruten郵輪就投入服務,運貨又載人。Hurtigruten在挪威語解作「快線」,當時由卑爾根(Bergen)北上至希爾克內斯(Kirkenes)最快七天可以完成。而Hurtigruten公司則擁有14艘郵輪,當中有11艘不間斷提供來往挪威峽灣的航程,夏天遊峽灣可以賞花睇飛鳥,冬天最吸引遊客的當然是北極光。我們選擇在挪威北部最大的城市特羅姆瑟登船,展開三天兩夜的追極光郵輪之旅。

 

Hurtigruten郵輪香港人未必個個識,但它其實是挪威老字號,已經有120年歷史,是遊峽灣追北極光之選。

遊客由南部上船北上至希爾克內斯,唔落船的話可以搭返轉頭,泊岸的時間會跟去程時不同,可感受每個地方日夜的不同分別。

船長說從南部卑爾根北上希爾克內斯來回要11天,他們有11艘郵輪每天出發。

 

為睇極光 險食霸王餐

今次登上的MS Polarlys只可容納700多位遊客,雖然不能跟十萬噸的郵輪相比,但勝在夠的骰夠Casual,不用盛裝亦沒有船長之夜,上落船手續簡單,不用排隊等成粒鐘先落到船。它設有一間主餐廳提供三餐,另有24小時小Cafe,半夜肚餓也可買蛋糕醫肚。話說第一日黃昏登船,立即去餐廳醫肚,剛吃得又飽又滿足之際,船長突然開咪話見到北極光,我立即掉下餐巾攞住相機登上甲板。坐郵輪的最大好處就是不用食西北風等北極光,船員船長見到有時就會立即通知旅客!加上荒涼的峽灣上只有連綿雪山,光害極少,所以北極光特別光特別清楚。在甲板上更可以睇足360°,唔怕被高樓大廈或樹林遮蔽住。眼見前方的北極光恍如布簾,在雪山上隨風飄揚,頭頂的更化成漩渦轉呀轉,後方的則把雪山也染成綠色,全船人都睇到嘩聲四起。忽然間餐廳經理走來細細聲跟我說,「你頭先未畀錢呀,一陣落去畀番啦。」失禮失禮!

 

我住的雙人房設兩張單人床,其中一張由沙發變身而成。

皇帝蟹主題自助餐,除了超過四公斤重的新鮮皇帝蟹,另有龍蝦、青口、大蝦、釀蟹蓋等,鮮味無窮。

郵輪上的手信店出售地道織品,手襪每對$313。

 

Hurtigruten Hunting the Light郵輪假期

航期:11月1日至3月31日
航道:提供3至11日來回卑爾根至希爾克內斯
收費:三天兩夜特羅姆瑟(Tromsø)至希爾克內斯雙人內艙房連早餐每位$2,425起;七天六夜卑爾根至希爾克內斯雙人房連三餐每位$15,633起。
網址:http://www.hurtigruten.com/

 

冰海即捕 巨型皇帝蟹

海鮮幾時都係即捉即食最好味,到埗希爾克內斯,首選參加King Crab Safari狩獵皇帝蟹團。希爾克內斯鄰近俄羅斯邊界,60年代前蘇聯政府想為北部居民增添食物來源,便由遠東引入皇帝蟹,從此蟹家族就在巴倫支海(Barents Sea)繁殖,去年在這一帶更捕獲300萬噸之多。

導遊先為我們準備禦寒衣物,再跳上雪上電單車,向Lang Fjord峽灣出發。氣溫約-20℃,峽灣早就結冰,導遊取出工具教我們鑿破冰面,再將預早放好餌的籠子拉上來,一隻、兩隻、三隻……足足有成十隻,隻隻都有兩三公斤重。把生猛的皇帝蟹帶回海邊小木屋,用鹽水煮20分鐘,鮮美無比的皇帝蟹就送到枱上。導遊說挪威人食皇帝蟹,愛把蟹肉放在多士上,再加上沙律醬來吃;眼見隔籬法國遊客用刀用叉食得優雅,我卻不理儀態,只管雙手拆蟹,最緊要趁熱食才夠鮮甜嘛,你話係咪?

 

將新鮮皇帝蟹用鹽水煮20分鐘,就變成眼前的蟹腳大餐,睇見都口水流。

冰海之上徒手捉蟹都係第一次,每隻都有兩三公斤重,全部生猛紮紮跳。

導遊一早準備好冰鑽和鋸,教我們在冰海上鑿個洞,再將籠子拉上來。

挪威人食皇帝蟹食得有儀態,剝肉後放在多士上,加上沙律醬食。

 

狩獵皇帝蟹

收費:每位$2,052,包乘坐雪上電單車前往收穫皇帝蟹及皇帝蟹午餐,最少二人成行。
網址:http://www.radius-kirkenes.com/

 

Travel Memo:挪威

簽證:持特區護照或BNO者均毋須簽證。查詢:25469881(挪威領事館)
機票:乘搭芬蘭航空由香港經赫爾辛基往返挪威奧斯陸,經濟位票價$5,420起(未連稅)。查詢:21171238或http://www.finnair.com/hk。從奧斯陸可乘北歐航空(SAS)或Norwegian Air之內陸航班,前往特羅姆瑟。
電壓:220V兩腳圓插頭
匯率:1挪威克朗約兌$1.37港元(文中價錢已折算為港元)

 

鳴謝:芬蘭航空、Visit Norway、North Norwegian Tourist Board、Visit Tromsø

原文 Link http://hk.apple.nextmedia.com/supplement/travel/art/20130226/18176752