暑假去歷險 曼谷恐龍冇膠味

(文章來源:果籽)有次家庭聚會,講起恐龍。我第一時間想到電影《侏羅紀公園》,表弟是《數碼暴龍》、姪仔就話《恐龍大時代》。年代變,恐龍好似越變越可愛。人人話first impression最重要,我的初體驗來自《侏》入面嗰隻識開門的恐龍,童年陰影到現在還記得,好想帶姪仔認識那種要驚又想睇的美好回憶。與其回顧舊電影,不如帶佢去親歷其境,收窄兩代「龍」溝。仲未諗到暑假帶仔仔去邊?考慮吓今年3月開幕的曼谷Dinosaur Planet,入面嘅恐龍,肯定真過之前新荔園條膠龍。

體驗,由此出發

年初網上一條短片廣傳,貨車尾放了隻識郁的暴龍,大搖大擺走在曼谷街頭,原來是新主題公園的預告,未開幕先轟動。難得唔使去華欣芭堤雅,樂園就位於市中心黃金地段,BTS Phrom Phong站一出,就見到大大個摩天輪,仲有將條頸伸到2樓咁高的腕龍。號稱用了5億泰銖(約1.1億港元)建造,園區卻只有約12,000平方米(約3.5個標準足球場),比上年臨時搭建的荔園還細。咁多錢,用咗喺邊?樂園公關Shin表示:「睇吓我哋啲龍,好真㗎!」

 

1:1巨龍 曉行識走會嚇人

聽落好笑,但一諗起新荔園恐龍屋門外隻膠龍,又不無道理。由門口到園內,有150隻識郁的模型恐龍,散落在草叢、都是1:1按原本體形製作,細緻到連皮的紋理都清晰可見,摸上去也相當有質感,又識眨眼、擺尾,相當犀利。還以為所有龍都是企定定,正想來張selfie,忽然一隻識行識走的速龍衝過來,不禁嚇了一跳,Shin這時笑了笑,「都是由職員扮的。」呢隻就帶點A貨味,屁股位的拉鏈清晰可見,不過勝在夠落力,一時兇人、一時滾地扮可愛,引得小朋友哈哈笑。但諗落曼谷攝氏40幾度高溫,還要着住咁大件恐龍服實熱到癲,不禁讚一句:「臨時演員都係演員!」

園區雖然的骰,但都有八大主題區。身邊不少朋友都表示想去,卻對園內設施、是否啱小朋友玩等有疑問,加上600泰銖(約133港元)入場費話平唔平,想決定去唔去,可以參考以下介紹。

場內有職員扮演恐龍,走動時連尾都識郁,一時嚇人一時賣萌,相當專業。

越野車、暴龍出沒注意的告示牌,很有《侏羅紀公園》的味道。

一進場,見到兩隻巨型腕龍,條頸伸到2樓咁高。

 

機動遊戲

Dino Eye 摩天輪帶你去冰河時期

本應是園內最有噱頭的設施,特別是近年越來越多摩天輪採用巨型吊廂,要同三唔識七的人同廂,有如茶餐廳卡位要搭枱咁屈質。這裏難得每廂只有兩個座位,採用全透明設計,最高點離地50米(約12層樓高),轉一圈約10分鐘左右。以為又係睇景咁悶?起動後,先有恐龍衝向着你猛叫,之後會進入冰河時期,到長毛象、老虎都出擊。設施要另外收費每位200銖(約45港元),不過現時畀錢都冇得玩,4月尾的時候一個吊廂着火,暫時停駛維修,幾時可以重新開放都仲未知!只剩下出入口位的「史前海洋世界區」開放,投影的魚龍會在牆上不時游過,地上放滿扮作氣泡的透明波,小朋友就當身處波波池咁,玩得興奮。
好玩度:★☆☆☆☆

公園的標誌性摩天輪,現時正進行維修,未知何時可重開。

Dino Eye入口處的波波池,小朋友至愛。

 

4D Deep World 我究竟睇咗乜

剛於5月才開幕的4D Deep World,進入後會坐上升降機造型的平台,左右兩邊播放動畫。據官方資料顯示,故事講述數百萬年前,存活於火山下的恐龍世界。但坐了5分鐘,除了聽唔明的泰文故事,恐龍只出現數十秒,被襲擊時也只是有「心意」地郁兩郁,大部份時間就望着一大片熔岩發呆,有點「我究竟睇咗啲乜」的感覺。
好玩度:★☆☆☆☆

4D Deep World以地心探險為題,不過片段頗為沉悶,4D效果亦不足。

 

Dino Farm 騎龍龍回到侏羅紀

一地泥沙扮考古的化石區不是重點,騎得郁得的電動恐龍方是細路最愛。手執遙控,劍龍、三角龍化身坐騎,可前後左右移動,以5秒一步的龜速前進,不怕小朋友「墮」龍。
好玩度:★★★★☆

Dino Farm的電動恐龍相當過癮,會按各種龍調校相應的步伐,雖說只限100磅以下人士參與,但不時見大人玩埋一份。

 

Raptor X-treme 逃避速龍追擊

經常玩密室逃脫,弱弱的場景佈置,令我往往不覺得有要逃走的衝動。想像你俾人困在籠內,有隻速龍追住你,要完成任務搵密碼先走得甩,咁先刺激!佈置成直升機失事,還要避過恐龍襲擊,同時又要在一堆貨櫃中,找回重要失物逃脫。開始時還會有泰文影片解說,不過who cares?一開門見到速龍砰砰聲追過來,大家嚇得雞飛狗走。場景、音效做得相當逼真,演員夠賣力營造緊張感覺,可說是玩過最好的逃脫遊戲。唯一可惜是每次有近20個遊客參加,人流行得太慢,可憐速龍有時跑到人前,咬你又唔係走又唔係,惟有企定張牙舞爪,好似等紅綠燈過馬路般無奈。雖然如此,依然是全園最好玩的設施,留意13歲以上先玩得。
好玩度:★★★★★

Raptor X-treme是最受歡迎的遊戲,假日來玩要排隊。

遊戲設計一流,可惜人流行得慢,「速龍哥」惟有無奈企定定張牙舞爪,等遊人走掉再追過。

 

Dino Square 唞一唞將劍龍食落肚

基本上是美食與手信區,由七彩恐龍蛋、恐龍窩夫等都有。推薦一試恐龍奶黃包,包的一邊做成劍龍脊上的小三角,用北海道牛奶做麵粉,食落香軟。

Dino Square有不少恐龍小食,當中這個劍龍麵包造型趣致。

 

教育區

Dinosaur District 超逼真化石

就如入了科學館,介紹恐龍的歷史,再到恐龍骨展覽。1:1的腕龍、三角龍、劍龍骨,跟自然博物館內的化石一模一樣。恐龍骨是不是真的?「當然是假的了!」Shin笑笑口答道,但顯然為幾可亂真的程度自豪。再進就是Dino Lab展區,有點像《侏羅紀世界》裏培植恐龍蛋的實驗室。忽然場內的燈一暗,模擬有暴龍來襲,搵自己骨肉,扮作科學家的講解員叫大家伏下,最後當然化險為夷,職員甚有戲,將平白的恐龍介紹變得生動。
好玩度:★★★☆☆

Dinosaur District內的化石,有如博物館內展出的一樣逼真。

 

Stars of Dino 搵恐龍自拍

堪稱是恐龍模型區,散落在草叢上,有三叠紀、侏羅紀和白堊紀的恐龍,由暴龍到鴨冠龍、劍龍,全部識動識叫,相當逼真,是園內的selfie位。
好玩度:★★★☆☆

Stars of Dino的恐龍很像真,沒膠味。

 

The Great Volcano andExtinction Live Show 小本製作劇場

每晚7、8及9點都有人扮的恐龍出來表演,講述火山爆發與恐龍絕種的故事。如果抱着去迪士尼、環球影城的睇騷標準注定失望,這裏只是小本製作,但睇住恐龍跳舞其實幾好笑,短短哋表演大約10分鐘左右,當係娛樂一下都好。
好玩度:★★★☆☆

火山劇場沒有大成本製作,但識笑識跳的恐龍,就?得小朋友相當開心。

 

Dinosaur Planet

地址:EM Sphere, between Sukhumvit Sois 22 and24, Wattana, Bangkok 10110
開放時間:上午10時至下午10時
入場費:成人600泰銖(約133港元)、小童400泰銖(約88港元)、90cm以下小童免費
查詢:http://www.dinosaurplanet.net
交通:乘坐空鐵BTS至Phrom Phong站,步行3分鐘

 

Travel Memo

簽證:持特區護照或 BNO,可免簽證停留90日。(查詢:泰國領事館25216481)
航班:乘泰航前往曼谷,來回機票約1,185港元起(已連稅)。

原文 Link http://hk.apple.nextmedia.com/supplement/travel/art/20160616/19655369 

撰文: 甄俊宇 

圖片: 林栢鈞 

延伸閱讀