東京清酒立飲場 可以飲唔可以醉

(文章來源:果籽)日本嘅立食文化,相信大家並唔陌生,最早出現立食嘅地方係日本嘅車站麵店,為咗方便趕車嘅客人填肚,而同時又慳咗用餐區嘅空間,立食文化就喺日本萌芽。

體驗,由此出發

時至今日,立食已經發展成一種頗普遍嘅廉價飲食文化,立食牛扒、燒肉、壽司、意粉等一街都係。最近東京出現咗清酒立飲場Kurand,只要擺低$238港紙,就可以任飲現場過百款來自日本各處嘅清酒,仲要唔限時間,肚餓嘅話可以自行攜帶食物入場邊食邊飲。留意返,呢度並唔鼓勵大家不醉無歸,重點在於體驗唔同口味嘅清酒,所以呢度並唔係劈場,如果你醉住走會畀店家blacklist,所以淺嚐好喇。呢個清酒立飲場暫時喺東京三個地方可以搵到,包括澀谷、池袋及淺草,係當地上班族收工後嘅聚腳點,所以成日爆場,想去的話最好預先訂座。營業時間係星期一至五由下午5至11點,周末下午12至4點及5至11點。

資料及圖片來源:ETtoday東森旅遊雲、Kurand Facebook

擺低入場費,拎住隻杯,就可以隨便開雪櫃斟清酒飲。

除咗雪櫃入面嘅酒款,亦會有每日限定嘅清酒,由店員為客人斟酒。

原文 Link http://hk.apple.nextmedia.com/supplement/travel/art/20160616/19655788 

撰文: 盧懿靜