走過高山低谷 山野情侶

(文章來源:果籽)行山友愛自然,揀女友有特別篩選技巧,庸脂俗粉、追逐名牌的港女,一律冇得留低。女友或老婆未必是運動健將,卻總是願意陪伴攀山越嶺,手牽手走過人生高山低谷。平時經常為準新人朋友攀上懸崖拍婚照的攀石教練,這天邀請妻子攀懸崖峭壁留倩影,沒華麗婚紗,只有中環半山美景與寒風,雖平凡但一樣放閃。另一名自稱毒L的九十後攝影師,寫潮文歌頌女友,介紹情侶必到山徑,以即影即有為愛情定格。

 

懸崖峭壁 執子之手

情陷夜中環,不一定聲色犬馬,難得有情人愛得轟轟烈烈,吊在約400米高的半山拍攝夜景婚紗照,名副其實是「半山將我包圍,誓死都一齊,壯觀得有如懸崖的婚禮」。要成就這壯舉,就要有位「不顧安危」的攝影師,他正是山藝兼攀石教練陸振宇(茶包),「拍攝攀石婚紗照,喺其他國家好普遍,我主要幫朋友影相。」他很多朋友都懂攀石,新手要想拍攝懸崖婚紗照都冇有怕,只要上幾堂惡補,力有不逮亦有教練用繩索將你拉上拉落,新娘穿長裙都不怕論盡。

替朋友拍攝得多,茶包反而沒與太太拍攝過懸崖婚紗照。「我哋從來冇試過一齊喺石牆上面睇中環靚景。」茶包太太方少玉(小玉)並非抱怨沒半張攀石婚照,反而沉醉於這個獨特時刻,兩公婆有意無意,齊齊穿藍色外衣從容擺pose,浪漫程度同樣冇得輸。高空的浪漫原來要付出代價,嬌小的跑步健將小玉爬高時忍不住發出哀號,「好大風,連嚿石都係凍嘅,好辛苦。」茶包反而鬆一口氣,不用當攝影師一身輕,享受被拍攝的樂趣。而他們三年前的婚紗照,是於共諧連理的印尼峇里島完成,不用帶繩索、安全帶、滑輪裝置,只需在海邊的岩石無憂無慮地擺pose,兩口子小小的身影,凸顯大自然的偉大,意境拍得住攀石婚紗照。

老婆小玉當防護時,邊鬆繩邊跟老公開玩笑說:「你唔好瓜呀,死肥仔。」

於陡峭岩石上打橫行,茶包當然特別留神,確保老婆安全越過。

丟掉情侶手錶 頭燈引路惹意外疑雲

「喺山上面需要隊友支持,將自己生命交畀對方,要相信對方先能夠完成旅程。」茶包和小玉七年前修讀校外課程認識,大家都熱愛大自然,一同行山及攀石,彼此交託生命。一個攀高,一個於懸崖下防護,調校繩子鬆緊,有時角色互換。老公防護時,小玉特別放心,「佢知我幾時攰,知我怕昆蟲,石頭上面有毛毛蟲經過,會提我避開。」而她防護老公時,忙着弄安全扣,不忘深情望老公,突然拋出一句:「你有冇眼屎?」怕他上鏡不好看,真夠無微不至,十分趣致,茶包邊揉雙眼邊甜笑,這對夫婦果真「笑聲笑聲滿載溫馨,快樂發心內」。縱小心翼翼,兩人亦有蝦碌時,六年前他們在東龍島攀石,不小心丟了一隻綠色手錶,「唔記得邊個整跌,搵咗一個鐘都搵唔到,有啲可惜,係我哋第一次買嘅情侶錶。」小玉回憶道,可幸慨嘆過後依舊笑意盈盈。攀石攀出愛情,茶包說這份浪漫,沿路支援的兄弟亦功不可沒,他們亦享受和友人在岩上相聚,夜攀中環半山齊賞月。他們曾試過用頭燈照亮引路,卻被山下住客以為有人出意外,消防員到場才發現擺大烏龍,令他們啼笑皆非。

每次攀石,十居其九都是茶包扶助小玉,神山之旅除外。前年10月,他們前往馬來西亞沙巴的神山,身在約3,000米高山巔,茶包被高山反應困擾,「頭暈頭痛,淨係想瞓覺。」小玉反而精神奕奕,「平時教練好興講轉個彎到,鼓勵學員唔好放棄,呢次輪到我????佢,求佢畀嘢我揹,發現我呢個老婆原來都有能力照顧老公。」執子之手,與子偕老,不論在平地或山嶺,高低起跌都互相扶持。

今次攀石,除隨行記者(右下)、攝影師(藍帽)和茶包伉儷,還有負責防護的朋友啤啤(橙衫)、Ian(藍衫)及阿Dick,拍與被拍都開心。

年前茶包烈日當空為一對新人於中環半山拍婚紗照,他們花近一年考證書及訓練攀石。(《壹週刊》圖片)

他們首對情侶錶是運動型手錶,可惜攀石時丟失了綠色那隻。

兩夫婦登上神山4,095米的山頂,茶包有高山反應,反而小玉精神奕奕,反過來鼓勵丈夫別放棄。

茶包有時和友人一起攀獅子山,由於攀爬高度達120米,老婆寧願步行至山頂等候。

茶包及小玉於印尼峇里島,徒手由沙灘爬上約兩層樓高的石灰岩上拍婚紗照。

部份圖片由受訪者提供

原文 Link http://hk.apple.nextmedia.com/supplement/travel/art/20160212/19487411 

撰文: 梁慧琳 

圖片: 林栢鈞  楊錦文