香港回歸地標 鼎你識唔識?

(文章來源:果籽)一座具歷史及文化意義的建築或地標,應該人人想去。但講起「回歸地標」,大家只會滿腦問號,連喺邊都唔知。呢啲地標被形容似屎塔或者似陽具,聽到都想笑。趁主權移交二十周年,我們邀請中大文化管理碩士課程主任何慶基一齊訪尋散落各區的古怪地標。

 

「鼎,你識唔識?」「鼎,邊度㗎個鼎,睇過……」冇人識你喎,鼎。

原來香港有座鼎紀念回歸,記者拿照片訪問大專生,學生哥誤以為它在黃大仙,知名度低到呢!其實這個鼎座落大嶼山昂坪寶蓮寺,天壇大佛腳下,可惜遊客只顧上香或在附近椅子休息,跟它拍照的人寥寥可數。它份量十足,重3噸,鼎身高1.997米,連底座高3.3米,是當年港島各界慶祝香港回歸籌委會在江西訂做。可惜運抵本港舉行過歡迎儀式後,寶鼎運送途中疑因負荷過重跌倒,三腳跛了一隻,運回江西搶修後,1998年修畢送回。記者所見,修補工作尚算成功,難以猜測哪隻是當天的跛腳。何慶基認為,鼎對香港毫無文化意義,但正好跟「頂」同音,近年亦令人聯想建制立法會議員周浩鼎,意義負面。他補充:「鼎是帝皇的象徵,跛腳喺易學代表凶兆。」難怪有人把回歸後本港不景氣,例如金融風暴、沙士等,都入跛腳鼎數。時事評論員區家麟曾撰文指:「當歪理日復一日轟炸,常識每天被扭曲強暴,教我如何不信邪?」

 

大埔海濱 螺旋屎塔冇電梯

講完「隱世」鼎,講番大家較熟悉的回歸地標,包括曾被網民嘲笑似屎塔、位於大埔海濱公園的回歸紀念塔。根據時任鄉議會主席劉皇發撰寫的碑記,回歸塔興建是為了紀念1899年英國接管新界時於大埔登陸,何慶基覺得好牽強,「一個紀念塔嘅意義唔係在於你點吹水賦予,而係一眼就睇得出佢嘅意義,同埋幾多人會去,例如美國自由女神像一睇就知國家的價值觀。」他指當時政府為了顯示對中央的忠誠建塔,反映擦鞋文化,十分嘥錢。此塔當年所花的建築費不詳,但安裝燈飾的支出,由2008年至2016年已超過200萬元,區議會可真有錢。採訪當天紀念塔正在維修,沒法登上。他笑指塔頂雖可望到吐露港景色,但其實在中大看更美。螺旋塔內沒有電梯,他認為設計沒考慮到行動不便者和老人的需要,「冇電梯,坐輪椅的人及長者都好難上到去。」

 

陽具式紀念碑 權力象徵

眾多地標中,紀念碑設計相對簡約,何慶基指出這是象徵權力的陽具式建築,他以回歸紀念柱為例,「見中央喺灣仔豎起咗紀念碑,無端端又喺元朗八鄉起紀念柱,設計好馬虎。」該柱由八鄉鄉事委員會興建,由時任新華社社長周南題字,聲稱是「唯一由民間籌建紀念回歸的香港建築物,是個極具價值的愛國景點。」聽完不禁毛管戙。

至於灣仔回歸祖國紀念碑,概念源自曾設計機場客運大樓的本港建築師鄧鏡華,基石由四塊丁方岩石組成,每塊是1,841厘米,代表英國於1841年佔領港島。柱身由206個石環組成,頂端設射燈,但此碑瑟縮一角,毫不顯眼,大概被中央的禮物——金紫荊搶盡風頭,何慶基認為金紫荊沒賣弄國家權威,避免使用跟中央相關的符號,使用市花洋紫荊,算是有照顧港人感受,可惜現今廣場長期被內地遊客佔據,香港人根本不想去。

塔內沒有電梯,令行動不便人士或長者難以登頂。   網上圖片

在大埔回歸紀念塔頂,可望到吐露港的景色。

位於元朗八鄉上村公園的回歸紀念柱。

金紫荊廣場矗立的雕塑,名為「永遠盛開的紫荊花」。

灣仔回歸紀念碑高20米,碑上有前國家主席江澤民的題字。

大嶼山回歸鼎三邊都有洋紫荊區徽,由本港雕塑師文樓設計。

曾先生:「冇聽過回歸紀念柱,好似插住一支香,喺元朗太遠,唔想去。」

MJ:「回歸紀念塔好似寄居蟹,外形特別,交通方便都會考慮去吓。」

原文 Link http://hk.apple.nextmedia.com/supplement/travel/art/20170701/20074360 

撰文: 梁慧琳 

圖片: 劉永發  梁志永