11座一行未算慘 4種奇怪航機座位設計

(文章來源:果籽)搭飛機最憎坐中間一排座位,尤其是中間的最中間位置,每去廁所都幾經心理掙扎先好意思起身講句excuse me。現時航機座位排列極其量只是3-4-3陣式,一排坐10個已經夠逼,無諗過低處未算低,竟然仲可以一排11座,排成3-5-3。

 

飛機製造公司Airbus最近展示了一架全球最大型號客機A380的最新座位配置,中排原來的4座位增設一個,變成3-5-3,總載客量即時最多增加70個,為航空公司帶來每年2300萬美元額外收入(約1.8億港元),Airbus堅稱每個座位的空間維持不變,闊度仍然是18寸,比一航廉航座椅闊一寸。

說來似乎對乘客完全冇影響,但試問機上一下子多了70人怎會不擠逼?廁所輪候時間也一定更長吧!不過以為3-5-3已經夠差,卻原來為了賺到盡,飛機公司和航空公司都可以去得更盡,為了用盡機上每寸空間擺放更多
坐位,曾經有過不少匪夷所思的設計概念:

1)全機企位:愛爾蘭廉航Ryanair CEO幾年前就曾經提出過全機改用企位,乘客只背靠椅背繫上安全帶度過整個機程都咪話唔驚,不過好快就被集團代表澄清暫時無意推行,鬆一口氣。

2)叠羅漢:Airbus亦曾經有過上下層座椅設計,騰出空間可讓座椅180度平放,乘客算是受惠,但後座上層乘客雙腳正正在前方乘客頭頂,感覺好似差啲喎。連設計圖都畫埋,但計劃最後無疾而終。

3)半蹲式:又係Airbus,呢種半蹲式係方便搭飛機的同時做埋gym嗎?真係sure可以半蹲一個鐘?

4)六角蜂巢:法國機艙設計公司Zodiac Seats France設計過六角形蜂巢式的擺法,讓每個座位有更長的空間放腳,但部份位置無可避免要坐「倒頭機」,亦難免會發生與鄰座面對面四目交投的尷尬情況。而其實目前已有部份航空公司的商務客位採用類似設計。

上下層座位設計能讓座椅180度平放,但坐上層的上上落落就比較煩。

半蹲式坐椅睇見都唔舒服,亦唔安全。

六角形蜂巢式用盡每一寸空間,但與鄰座陌生乘客對望有時又幾尷尬,加道屏風就差唔多。

原文 Link http://hk.apple.nextmedia.com/supplement/travel/art/20160606/19642466 

撰文: 曾冠輝